Një numër kombesh thonë se ekziston një kërcënim i lartë i një sulmi terrorist në aeroportin e Kabulit dhe kanë paralajmëruar qytetarët e tyre që të mos udhëtojnë atje.
Australia, SHBA dhe Britania e Madhe kanë lëshuar paralajmërime për shtetasit e tyre, shkruan BBC. Këto vende thonë që ata që ndodhen jashtë aeroportit këshillohen të largohen menjëherë nga zona.
Të enjten, ministrja australiane për Punët e Jashtme, Marise Payne, tha: “Ekziston një kërcënim i lartë dhe i vazhdueshëm për një sulm terrorist”.
Ky njoftim erdhi disa orë pasi Departamenti Amerikan i Shtetit u tha atyre që prisnin në aeroportin e Kabulit që të “largoheshin menjëherë”.
Mbretëria e Bashkuar lëshoi këshilla të ngjashme duke u kërkuar njerëzve atje “të largohen në një vend të sigurt dhe të presin informacione të mëtejshme”.
Më shumë se 82,000 persona janë evakuuar me aeroplan nga Kabuli, pasi Afganistani ra në duart e talebanëve 10 ditë më parë. Vendet po nxitojnë për të evakuuar njerëzit deri në 31 gusht.
Mijëra afganë janë ende duke pritur brenda dhe jashtë aeroportit, duke shpresuar të fluturojnë jashtë vendit.
Ndërkohë që talebanët kanë kundërshtuar zgjatjen e afatit, por gjithashtu kanë premtuar se do të lejojnë të huajt dhe afganët të largohen nga vendi përtej 31 gushtit, sipas sekretarit amerikan të shtetit Antony Blinken./Opinion.al
