Charles McGonigal, ish-kreu i kundërzbulimit të FBI-së në Nju Jork, i cili është akuzuar për fshehjen e 225,000 dollarëve që dyshohet se ka marrë nga një ish-punonjës i inteligjencës shqiptare, mund të zgjidhë çështjen pa qenë nevoja të dalë në gjyq.
Deklaratën e ka bërë për CNN avokati i McGonigal, Seth DuCharme.
McGonigal, i cili ka punuar për 22 vite në FBI dhe ka dalë në pension në vitin 2018, është akuzuar për dy çështje të ndryshme në Nju Jork dhe Uashington DC, përfshirë edhe fshehjen e 225,000 dollarëve të marra nga një ish-agjent i shërbimeve sekrete shqiptare.
Gjatë një konference të premten në çështjen DC, avokati i McGonigal, Seth DuCharme, vuri në dukje se të pandehurit kanë dy zgjedhje, të pranojnë fajin ose të shkojnë në gjyq.
Ai shtoi duke thënë se kishte një “shans të mirë që çështja do të zgjidhet” pa pasur nevojë të shkojnë në gjyq.
Ndërkohë që McGonigal është deklaruar i pafajshëm për të dyja aktakuzat.
Komentet e DuCharme sugjerojnë se prokurorët e qeverisë dhe avokatët e McGonigal mund të bashkëpunojnë për një marrëveshje mes palëve për pranimin e fajësisë në këtë rast.
Megjithatë mbetet e paqartë se si do të dukej një marrëveshje për pranimin e fajësisë midis prokurorëve dhe McGonigal si dhe për cilat akuza ai mund të deklarohet fajtor./Opinion.al
