Agjencia e Mbikëqyrjes Policore ka ndaluar ditën e sotme tre punonjës policie dhe një doganier në Pikën Kufitare “Hani i Hotit”, pasi akuzohen për veprën penale “Shpërdorim i detyrës”.
Sipas njoftimi, AMP bën me dije se ndalimi i tyre lidhet me ngjarjen e 17 shtatorit të 2023, ku një kamion me targa shqiptare, pasi ka kryer procedurat e daljes nga Republika e Shqipërisë nëpërmjet Pikës Kufitare “Hani i Hotit”, në kundërshtim me ligjin dhe procedurat standarde, është ndaluar nga policia e Pikës së Kalimit Kufitar “Bozaj”, Mali i Zi, pasi brenda tij është gjetur një sasi prej 442.084 kg lëndë narkotike e dyshuar “Canabis Sativa”.
Njoftimi i plotë:
Pas hetimeve disa mujore mbi procedimin penal të vitit 2023, Agjencia e Mbikëqyrjes Policore (Rajoni Shkodër – Lezhë) në bashkëpunim me Drejtorinë e Hetimit Doganor dhe Prokurorinë Pranë Gjykatës së Shkallës së Parë të Juridiksionit të Përgjithshëm Shkodër, ka ekzekutuar urdhrat e ndalimit për tre punonjës policie dhe një doganier. Këta shtetas janë të dyshuar për kryerjen e veprës penale “Shpërdorim i detyrës”.
-L. Ç., punonjës policie në Pikën Kufitare “Hani i Hotit”.
– F. H., punonjës policie në Pikën Kufitare “Hani i Hotit”.
– T. M., punonjës policie në Pikën Kufitare “Hani i Hotit”.
– S. E., me detyrë Doganier në Pikën Kufitare “Hani i Hotit”.
Urdhrat e ndalimit vijnë pas hetimeve të thelluara me metoda speciale në lidhje me ngjarjen e datës 17/09/2023, ku një kamion me targa shqiptare, pasi ka kryer procedurat e daljes nga Republika e Shqipërisë nëpërmjet Pikës Kufitare “Hani i Hotit”, në kundërshtim me ligjin dhe procedurat standarde, është ndaluar nga policia e Pikës së Kalimit Kufitar “Bozaj”, Mali i Zi, pasi në kamion është gjetur një sasi prej 442.084 kg lëndë narkotike e dyshuar “Canabis Sativa”.
