Në përfundim të takimit me të rinjtë në Korçë, kreu i opozitës Lulzim Basha është pyetur nga mediat në lidhje me lajmin dhe akuzat se ka përfituar një vilë ku është zhvendosur së fundmi. Ai tha se kjo është një gënjeshtër dhe përpjekje cinike e kryeministrit Rama për të zhvendosur vëmendjen e publikut nga skandalet e qeverisë.
“Nuk ka gënjeshtër që mund të më heqë nga detyra ime. Gënjeshtrat kundër meje dhe familjes time janë një përpjekje cinike e Edi Ramës për të hequr vëmendjen nga lista e gjatë e dështimeve dhe e skandaleve të tij. Prandaj, nuk bëhem pjesë e kësaj loje. Por siç e shikoni, jam në një tur takimesh me rininë, me qytetarët për të diskutuar të vërtetën e hidhur jo gënjeshtrat e qeverisë dhe mbi të gjitha për të diskutuar rrugët e daljes, zgjidhjes nga kjo krizë”, deklaroi Basha.
Teksa u pyet për arrestimin e Redjan Rrajas, Basha ripërsëriti se kjo është një luftë bandash të lidhura me qeverinë dhe që tregon nevojën për zgjedhjet të parakohshme.
“Nevojë akute për ndryshim përmes zgjedhjeve të parakohshme, të lira dhe të ndershme. Kjo do arrihet duke bashkuar gjithë vullnetet pozitive të shqiptarëve. Nuk ka ndryshim pozitiv që mund ta ndalë asnjë qeveri dhe asnjë bashkëpunim mes qeverisë dhe krimit”, deklaroi kreu i PD. /Opinion.al
