Policia e Shtetit ka reaguar pas akuzave të bëra nga kryetari i grupit parlamentar të PD-së, Edi Paloka për drejtues të policisë së shtetit, të përfshirë në kontrollin e drogës.
Policia i ka kërkuar Partisë Demokratike që t’i drejtohet prokurorisë për akuzat e faktuara.
“Për të disatën herë, nga foltorja e subjektit politik Partia Demokratike opinioni ndjek të njëjtat sulme kundër Policisë dhe drejtuesve të saj.
Policia e Shtetit në respekt të këtij opinioni ka vetëm një përgjigje të shkurtër dhe të qartë: nuk ka asnjë tërheqje në këtë luftë kundër krimit dhe paligjshmërisë.
Edhe për PD-në përgjigja mbetet e njëjtë: për çdo akuzë dhe fakt të pretenduar, t’i drejtohet Prokurorisë.
Kjo është e vetmja rrugë për të ndërtuar shtetin e së drejtës, ku politika t’i përmbahet ligjit e institucionet të bëjnë detyrën pa presion politik”, thuhet në deklaratën e policisë.
