Një 28-vjeçar është vetëdorëzuar në polici pasi ishte dënuar nga gjykata me masën e sigurisë arrest në burg për akuzën “Prodhimi dhe shitja e narkotikëve, e kryer në bashkëpunim.
Sipas policisë, Aurel Babasi kishte mundur të largohej gjatë operacionit të koduar“Ndalesa e Fundit”, në të cilin u arrestuan dy persona, ndërsa tre të tjerë arritën të largoheshin.
Gjatë operacionit të 15 nëntorit 2017, policia vuri në pranga Fatbardh Hoxhën, 28 vjeç, banues në Komes, Fushë Krujë si dhe Kledi Xekan, 31 vjeç, banues në fshatin Halilaj, Fushë Krujë. Ndërsa tre bashkëpunëtorët Aurel Babasi, Sar Hoxha dhe Edmond Xaka, të gjithë nga fshati Kameras i Fushë Krujës, arritën të largoheshin sapo panë policinë.
Njoftimi i policisë
Specialistët për Hetimin e Narkotikëve në DVP Shkodër bënë ekzekutimin e urdhrit të ndalimit, pasi Gjykata e Shkallës së Parë Shkodër për shtetasin A. B., 28 vjeç, banues në Fushë-Krujë ka dhënë masën e sigurisë “Arrest në burg”.
Ky shtetas, më datë 15.11.2017, gjatë operacionit të finalizuar “Ndalesa e fundit” nga D. V. P. Shkodër, në bashkëpunim me shtetasit K. X., F. H., të cilët janë arrestuar gjatë operacionit, si dhe me E. X. e D. H., të cilët janë shpallur në kërkim, në afërsi të një karburanti në fshatin Grizhë, Malësi e Madhe, iu gjetën dhe sekuestruan në cilësinë e provës materiale rreth 70 kg Cannabis Sativa.
Shtetasi A. B. së bashku me shtetasit E. X. dhe D. H. sapo kanë parë policinë kanë arritur të largohen.
Materialet iu referuan Prokurorisë së Rrethit Gjyqësor Shkodër, për veprën penale “Prodhimi dhe shitja e narkotikëve, e kryer në bashkëpunim./ Opinion.al E.Xh.
