Që pas zgjedhjeve të 25 Qershorit, drejtuesit e LSI-së janë zhvendosur në Jalë. Në një kamping gjigand, ku vijnë e ikin grupe të rinjsh të Lëvizjes Rinore për Integrim bëhet plazh, por edhe politikë. Radha për të folur me të rinjtë këto ditë, ka qenë e Petrit Vasilit, ish kryetar i LSI-së.
Vasili u shpreh se LSI arriti rezultatin e saj më të lartë në zgjedhjet e fundit, por ky rezultat mund të ishte edhe më i mirë nëse nuk do të kishin ndikuar parat e drogës dhe të kriminelëve.
“Sot jemi në një situatë të re politike, jo për partitë që janë në qarkullim, por për situatën që prodhuan zgjedhjet. Është një fakt i padiskutueshëm që LSI-a arriti rezultatin e saj më të lartë ndër vite. Ky nuk është rezultati i vërtetë, pasi, në qoftë se nuk do të ishin zgjedhjet e drogës dhe kriminelëve, rezultati për LSI-në do të ishte dyfish“.
Nga kampingu i Jalës ai paralajmëroi një opozitë parimore kundër qeverisë së Ramës.
“Opozita nuk është çështje numrash, është çështje morali. Nëse je i vendosur qartë, nuk je i shitur dhe i blerë, nuk je i kapur dhe qëndron fort në çështjet parimore, mjaftojnë edhe 10 njerëz ta mbrojnë këtë çështje si duhet, dhe ajo bëhet çështje e të gjithëve, – vijoi Vasili. – Në këtë drejtim, ne kemi sot të gjitha ato që na duhen për të bërë një opozitë jo thjesht dhe vetëm të fortë, jo thjesht dhe vetëm me ide, por një opozitë që vërtet është pasqyrë e një qeverie fytyrë-shtrembër, që është peng i interesave të shëmtuara”
Gjatë kohës që LSI pushon në Jalë në Tiranë u rrit çmimi i ujit. Dy votat e këshilltarëve bashkiakë të kësaj force politike, sipas LSI, u shitën tek kundërshtarët politikë.
