Deputetja e Partisë së Lirisë, Monika Kryemadhi gjatë një bashkëbisedimi me gazetarët këtë të enjte mohoi akuzat e kryeministrit Edi Rama se Lëvizja Socialiste për Integrim është e përfshirë në financimin rus.
Kryemadhi tha se akuzat e Ramës bëhen për të hequr vëmendjen nga problemet e vërteta që ka vendi. Sipas saj, nëse PL do ishte e përfshirë në çështjen e rublave, kryeministri Rama do të kishte vënë prokurorë për të hetuar.
Ndër të tjera, Kryemadhi akuzoi kryeministrin Rama për lidhje të ngushta me ish-drejtorin e FBI, ndaj të cilit ka një hetim në SHBA për lidhje me financimet ruse.
“Mendoj që e keni kuptuar Ramën që bërtet: “ujku, ujku dhe çakalli bën kërdinë”. PL dhe ish-LSI nuk kanë marrë asnjëherë fonde ruse. Asnjë nga PL nuk ka dalë në listën e pyetjeve të një hetimi të madh që bëhet sot në SHBA për ish-drejtorin e FBI, që akuzohet drejtpërdrejt si mik i ngushtë i zotit Rama për dhënie e marrie dhuratash që kanë të bëjnë me financimet ruse. Është një investigim i SHBA dhe Rama ka bërë shumë për ta eliminuar këtë investigim dhe këtë lajm në media për të shkëputur vëmendjen e opinionit publik, nga varfëria, nga largimi në masë i shqiptarëve. Po të kishte Rama do të vinte nja 10 prokurorë të tjerë për të hetuar çështjen e rublave por nuk i ka. Sa herë i shtrëngohet litari për inceneratorin e Tiranës nxjerr bllof mediatik”, tha Monika./Opinion.al
