Ish-ministri i Brendshëm, Saimir Tahiri, ditën e sotme, ka postuar një video interesante në 38-vjetorin e lindjes, për t’iu përgjigjur akuzave që rëndojnë ndaj tij në lidhje me grupin kriminal të Habilajve.
Përmes një postimi në Facebook, Tahiri nuk ka harruar të falenderojë të gjithë miqtë për urimet për ditëlindje që kanë ardhur në adresë të tij.
Por përmes kësaj videoje, e cila mbart edhe një mesazh lidhur me akuzat që rëndojnë ndaj tij dhe të vërtetën, Tahiri me shumë gjasa ka thënë diçka…
Simbolika e mollës
Në qendër të videos është një mollë, e cila për dikë mund të jetë edhe banane, madje besohet se është një banane, pastaj jo vetëm një person, por dhe shumë të tjerë mendojnë se molla është një banane, edhe pse ajo është një mollë dhe vetëm një mollë.
Molla në video nuk mund të jetë vetëm një metaforë e thjeshtë, por edhe një simbol. Nuk ishte ndryshe edhe metamorfoza e Gregor Samsës, personazhit simbol të Franc Kafkës.
Pikërisht në çastin kur sapo ndodh metamorfoza, pra kur ai praktikisht bëhet i padobishëm dhe i përshtirë, në fillim për familjen dhe pastaj për shoqërinë, pikërisht në atë çast, po shkallë-shkallë, por tashmë në zbritje drejt ferrit dhe drejt subkoshiencës së zezë, Gregor Samsa tashmë si mëkatar, shkon drejt vetëasgjesimit apo vrasjes nga dora e të atit.
Ai mund të ishte vrarë me plumb, me thikë, me bastun, me bisht fshese, me çdo mjet tjetër, por autori e vret me mollë, pikërisht në atë frut aq familjar, që mbart mbi vete aq shumë simbole se çdo frut tjetër tokësor.
Kujtojmë se mollët e Hesperideve e bënin njeriun të pavdekshëm; Lufta e Trojës nisi vetëm nga një mollë e hedhur nga Erida grindavece; me mollë janë helmuar mbretërit; molla u vendos si shenjë mbi kokën e djalit të Vilhelm Telit në dramën e njohur të Shilerit; Kaligula e ushqente me mollë Kalin e tij Incitatusin, të cilin e bëri edhe senator; Minotauri e fshihte çelësin e tij brenda një kokrre molle; Njutoni dinak thoshte se e zbuloi teorinë e tij nga rënia e një kokrre molle dhe këtë e bënte që t’i jepte kuptim dhe rëndësi biblike ligjit të gravitetit.
Prandaj edhe Tahiri përdor mollën…
