Emri i Drejtorit të Arsimit në Dibër, Drin Gjeci u lakua sot nga selia e PD, duke e akuzuar se po i kërcënon mësuesit me vendin e punës, nëse ata nuk votojne kandidatin e majtë. Por Drin Gjeci në një prononcim për “News24” shprehet se ndërhyrja e politikës në arsim ka arritur deri në një telefonatë që kreu i PD, Lulzim Basha i ka bërë personit të tij.
“Mora gjatë ditëve të fundit një telefonatë nga Lulzim Basha. Kreu i PD tentoi të më intimidojë në kryerjen e detyrës sime”, shprehet Gjeci. Gjeci theksoi se nuk do të pranojë kurrë ndërhyrjet politike në punën e Drejtorisë Arsimore, të cilitdo kah politik të jenë. “Nuk pranoj në asnjë rast ndërhyrjet dhe presionet politike. Kurse deklaratat e PD, i cilësoj si presione që synojnë përbaltjen e institucionit arsimor të Dibrës”, tha ai. Në një deklaratë për mediat nga selia blu, deputeti demokrat Gent Strazimiri denoncoi sot drejtorin e Arsimit në Dibër, Drin Gjeci, i cili sipas tij thërret arsimtarët në zyrë, duke i kërcënuar me njoftime për largim nga puna, nëse nuk votojnë kandidatin e qeverisë. “Janë rreth 300 arsimtarë të kërcënuar deri tani”, u shpreh Strazimiri.
Ndërkohë, kujtojmë se edhe kryeministri Rama është akuzuar nga ishdrejtorja e gjimnazit “Ismail Qemali” në Tiranë, për presione në vitin 2013.
