Kryetari i Komisionit të Ligjeve, pasuesi i Xhafës, Ulsi Manja dhe anëtarja e PS në këtë komision Vasilika Hysi kanë dalë sot në një konferencë për mediat për tju përgjigjur akuzave të PD, sipas të cilave janë trafikuar ligjet nga z.Xhafaj me qëllimin mosekstradimin e vëllait të tij, Agron Xhafaj.
Ulsi Manja e nisi fjalën e tij duke thënë se “Reforma në drejtësi është vënë padrejtësisht nën sulmin e partive të opozitës”. Ai tha se “PD-në e kuptojmë se e ka braktisur paketën e dytë të ligjeve të paketës në drejtësi, por nuk e kuptojmë sot ndryshimin e qendrimit të LSI e cila ka qenë prezente në komisionin e Ligjeve”.
PD akuzoi se Neni 491 i Kodit të Procedurës Penale që parashikon rastet kur një person nuk ekstradohet është falsifikuar nga vetë kreu i Komisionit për Reformën në Drejtësi, Fatmir Xhafaj që ka pasur për synim të mbrojë të vëllain, Agron Xhafaj nga ekstradimi.
Duke folur pikërisht për ktë ligj, Ulsi Manja tha: “Konkretisht te projektligji, ligji tashmë i kodit të procedurës penale, neni 491. Komisioni i Posacëm i Reformës në Drejtësi pas miratimit të ndryshimeve kushtetuese dhe paketës bazë mori vendim që paketa e dytë të miratohet në Komisionin e Ligjeve. Ia dërguam seancës plenare dhe më 22 dhjetor 2016 Kuvendi vendosi që 26 projektligjet të shqyrtohen e miratohen nga Komisioni i Ligjeve. Neni ka qenë i reflektuar jo vetëm në draftin e grupit të eksperteve por më 12 mars një ditë para diskutimit ka qenë i shpërndarë për relatorët, misionit EURALIU-s, deputetëve të LSI, Ministrisë së Drejtësisë. Komisioni i ka miratuar nen për nen për 3 ditë ku e gjithë praktika parlamentare është e aksesuesshme për këdo që ka interes të zbardhë plotësisht edhe këtë nen shumë të debatuar”, tha Manja.
