Pas akuzave të Partisë Demokratike për abuzime të tij dhe tendera të zhvilluar pa garë, ka reaguar Drejtori i Drejtorisë së Përgjithshme të Shërbimeve të Transportit Rrugor, Blendi Gonxhja.
Përmes një publikimi në rrjetin social Facebook, Gonxhja shkruan se çdo procedurë prokurimi për investime nga ana e DPSHTRR është zhvilluar me garë, elektronikisht, e hapur dhe konform ligjit!
“DPSHTRR dhe unë si drejtues ndiejmë keqardhje për nivelin e sulmit të sotëm nga PD, kthyer tashmë në një qëllim në vetvete për nxirjen sistematike, ditore, javore dhe baltosjen e punës dhe imazhit tonë, si ekip dhe si qytetarë! Çdo procedurë prokurimi për investime nga ana e DPSHTRR është zhvilluar me garë, elektronikisht, përmes APP, e hapur dhe konform ligjit! Ofertat fituese janë mesatarisht 10% nën fond limit!”, shkruan Gonxhja.
LEXO EDHE – PD: Blendi Gonxhe, 1.7 milionë euro tendera në pandemi
I akuzuar se ka kryer tenderime gjatë periudhës së pandemisë për shpenzime luksi dhe fasada, Gonxhja përgjigjet:
“Kontratat e lidhura përpara Pandemisë, që lidhen me investime infrastrukturore përfshinin rikualifikime e sistemime, zgjerime, izolime, ndërhyrje në hapësirat e jashtme por edhe salla shërbimi e testimi, arkiva, ambiente sanitare, ambiente teknike e sisteme sigurie e monitorimi, sisteme radhe a sinjalistike, ajrimi, rrjete, etj. nuk mundet kurrsesi të etiketohen si FASADA! Ato janë prova të qarta të punimeve komplekse, me disa faza, brenda e jashtë me synim thelbësor modernizimin e shërbimit dhe komoditetin për qytetarët/subjektet! DRSHTRR-të Tiranë, Fier, Elbasan, Durrës, Shkodër, Vlorë do pasohen edhe nga rehabilitimet në Lushnje, Gjirokastër, etj!”./Opinion.al
