Partia Demokratike i kërkoi sot Prokurorisë së Përgjithshme dhe KQZ-së të verifikojnë formularët e vetëdeklarimit për deputetët Aqif Rakipi i PDIU dhe Gjetan Gjetani i PS, pasi sipas PD ka informacione se kanë kryer krime jashtë shtetit, konkretisht në Itali. Aqif Rakipi është një emër i përfolur edhe më herët nga PD por dhe Prokuroria konfirmoi sot se hetimet ndaj tij në funksionin të ligjit të dekriminalizimit kanë nisur prej muajsh, ndërsa Gjetan Gjetani është deputet i ri dhe emër i ri që artikulohet nga opozita.
Për këtë arsye, Opinion.al kontaktoi me deputetin socialist të Lezhës për të marrë një reagim prej tij pas akuzave të demokratëve. Ai nuk e fshehu habinë se si u gjet emri i tij sot në media dhe theksoi se këto janë shpifje dhe i kërkoi prokurorisë dhe KQZ të konfirmojnë pastërtinë e figurës së tij.
Gjetan Gjetani: “Sot rreth orës 13:00 përmes medias kam parë akuzat e PD-së. Unë deklaroj publikisht se nuk kam jetuar kurrë jashtë shtetit, madje në Itali nuk kam shkelur kurrë. Gjatë gjithë jetës sime kam bërë një udhëtim të shkurtër turistik (1 ditor) në Malin e Zi me familjen. Ku është i vetmi udhëtim i imi jashtë vendit. Nga ana tjetër PD pretendon se nuk kam plotësuar formularin. Unë e kam plotësuar formularin e vetëdeklarimit në kuadër të ligjit kur kam qenë nëpunës i administratës, pra përpara se të bëhesha deputet. Dokumentet janë aty, KQZ dhe Prokuroria të bëjnë gjithë verifikimet e duhura. Deklaroj se jam i pastër dhe PD nuk më përbalt dot”. /Opinion.al
