Kryeministri Edi Rama ka reaguar lidhur me akuzat e opozitës për Portin e Durrësit duke i cilësuar si turp dhe poshtërsi në dëm të interesit të vendit.
Në një status në “Twitter”, kreu i qeverisë thotë se opozita synon pengimin e investimit të madh transformues për Durrësin, përmes intimidimit të një prej kompanive të Emirateve të Bashkuara, të cilën Rama thotë se qeveria e ka sjellë në Shqipëri me mbështetjen e Presidentit, Sheikh Muhammed Bin Zayed.
“Sulmi haxhiqamilist i Aleancës së Rublave dhe bedelave të saj kundër projektit të Portit Turistik të Durrësit është një turp dhe një poshtërsi e madhe në dëm të interesit të vendit, ndërkohë që tërbimi shpifarak është prova se i kanë bërë vetë tërë pisllëqet që akuzojnë! Synimi i këtij sulmi të dëshpëruar është pengimi i këtij investimi të madh transformues për Durrësin dhe gjithë Shqipërinë, përmes intimidimit të një prej kompanive flamur të Emirateve të Bashkuara, të cilën e kemi sjellë me mbështetjen e Presidentit, Sheikh Muhammed Bin Zayed. Akuzat haluçinante kundër një kompanie ardhja e së cilës është përveç të tjerash një imazh i ri fitues i Shqipërisë në arenën ndërkombëtare, janë tallja e radhës me ata shqiptarë që akoma i ndjekin pas këta të shitur, pa fe, pa atdhe, pa din e as iman”, shkruan Rama.
