Opozita ka akuzuar qeverinë Rama se ka shfrytëzuar aplikacionin ‘Aktivisti’ duke shantazhuar të gjithë punonjësit e administratës që të jenë pjesë e tij dhe ti bëjnë like aktiviteteve të ministrave.
Kryeministri Rama me një postim në rrjetet sociale ka reaguar duke thënë se opozita harroi patronazhistët dhe u fokusua tek aktivistët.
Teksa hedh poshtë akuzat, Rama thotë se aktivistët janë në sprovën e parë dhe përsëri kanë shqetësuar kundërshtarët politikë.
Kryeministri ka përgëzuar të gjithë aktivistët dhe ka paralajmëruar se opozita nuk ka parë gjë akoma.
“Të dashur aktivistë të Partisë Socialiste,
siç edhe ju’a kisha thënë, ja ku erdhi dita që i harruan patronazhistët dhe u turrën mbi aktivistët
Urime për pagëzimin tuaj në baltën e djajve, e cila është prova e relevancës në skenën e betejave politike dhe sociale në këtë vendin tonë të vogël e të bukur, por me zhurmaxhinj e ligësira që s’të ndahen
Tani ju mund të ndjeheni realisht të vlerësuar si një forcë e re në fushëbetejë e në ndërkohën që patronazhistët e kalitur në përballje të shkuara, po përgatiten të hyjnë së shpejti në skenën e betejës së radhës, si një forcë e sprovuar më shumë se sa njëherë, ju jeni në sprovën tuaj të parë dhe ja urdhëro si erdhi puna, ende pa mbaruar nxemjen i keni shqetësuar shumë kundërshtarët tanë të dëshpëruar e të çoroditur
Përgëzime
Tani futini një marsh tjetër jashtë programit, që ta shohin të paudhët se sa gabim bëjnë kur na e rrisin adrenalinën, duke na ngacmuar edhe kur s’kanë parë gjë akoma”, shkruan Rama.
https://www.facebook.com/ediramaal/videos/%EF%B8%8Ft%C3%AB-dashur-aktivist%C3%AB-t%C3%AB-partis%C3%AB-socialiste-si%C3%A7-edhe-jua-kisha-th%C3%ABn%C3%AB-ja-ku-erdhi-/1295810857643324/
