Nënkomisioni ‘ad hoc’ për përzgjedhjen e kandidatëve për Këshillin e Lartë Gjyqësor dhe për Këshillin e Lartë të Prokurorisë është mbledhur sot për të miratuar listën e dytë, pasi e para u rrëzua në parlament javen e kaluar.
Ky komision ka përjashtuar nga gara Alitn Hazizaj, i cili ishte kandidat për KLGJ nga radhët shoqërisë civile. Vendimi vjen pas akuzave të PD se Hazizaj prekej nga ligji i dekriminalizimit. Mbledhja është zhvilluar me debate të forta mes shumicës dhe opozitës.
Sakaq ka dhënë dorëheqjen nga gara edhe avokati Saimir Visha. Përmes një letre dërguar Kuvendit, ai shprehet se “nuk dua të jem pjesë e një procesi pa dakordësi politike”.
“Procesi i zgjedhjes së anëtarëve të KLGJ ka përfunduar drejt përzgjedhjes së goglave. Dëshiroj të bëj me dije se unë personalisht nuk dëshiroj të jem pjesë e përzgjedhjes nga procesi i goglave. Do dëshiroja të përzgjidhesha me dakordësi politike. Duke qenë se kjo nuk është e mundur, unë tërheq emrin tim nga lista e kandidimit. Kam 20 vite në avokati dhe kam luftuar për reformën në drejtësi. Avokatët nuk duhet të konsiderohen avokat gogël. Unë nuk kërkova punë”- thuhet në letrën e dërguar në Kuvend.
