Një debat i ashpër mes kreut të PD-së Lulzim Basha dhe Ministrit të Brendshëm Fatmir Xhafa ka vazhduar për disa minuta në seancën e sotme Parlamentare. Basha hodhi akuza të forta për qeverinë dhe lidhjen e saj me krimin dhe drogën.
Sipas Bashës Shqipëria nga një vend i sigurt 4 vite më parë është kthyer në vend me rrezikshmëri të madhe ndërkombëtare pasi qeveria dhe institucionet sipas tij janë të lidhur me bandat. Deklaratat e forta Basha i bëri duke ju referuar ngjarjeve më të fundit në Elbasan. Ku ka deklaruar se gjendja është tepër kritike dhe bandat ndërveprojnë me qeverisjen lokale të Qazim Sejdint me mbështetje të plotë të Edi Ramës.
“Çfarë kuptuam nga ministri i brendshëm që problemi është opozita e cila po nxin veten?
Problemi është kjo e vërtetë e dhimbshme që rëndon mbi qytetin e tretë më të madh, Elbasanin, që i ka kyçur qytetarët për dy vjet nën terrorin e bandave, të bëra njësh me politikën lokale të Qazim Sejdinit, me mbështetjen e Edi Ramës. E njëjta situatë është në Lezhë, Shkodër, Lushnjë e Fier.
Krimi sundon Shqipërinë, bandat sundojnë Shqipërinë. Kjo nuk është propagandë, nuk ka PD fuqi të manipulojë raportet e Europolit e Interpolit dhe agjencive ligj zbatuese të vendeve anëtare të Bashkimit Europian. Por ka vetëm fuqinë të tregojë të vërtetën këtu, para këtij parlamenti.
Fjalimi që lexove ishte fjalimi i vjetër i Saimir Tahirit. Analiza, ndjeshmëria jo vetëm përballja. Por këtë nuk e bën dot ti, nuk e ke fajin ti. Ti je në konflikt interesi dhe natyrisht ai që të vuri është i kapur”, iu përgjigj Basha Xhafës. /Opinion.al
