Deputeti socialist Sadri Abazi ka reaguar pas deklaratës së bërë nga ish-deputeti i PD, Luçiano Boçi, i cili e akuzoi se është përpjekur të fshijë provat duke eliminuar 2 kate të pallatit të tij në Durrës, pasi ishin dëmtuar nga tërmeti i 26 nëntori.
Ndërkohë, Abazi tha se këto akuza janë të pavërteta dhe se në hotelin e tij nuk ka asnjë dëmtim dhe ndërhyrje në kate pasi është funksional. Ai tregoi më tej se hoteli ka pasur vetëm disa plasje të vogla në mure.
Po ashtu, deputeti socialist tha se nuk ka replikuar me Boçin, siç deklaroi ky i fundit, por vetëm ka qeshur dhe e ka takuar përzemërsisht dhe se ai i kishte thënë “ju nëmi Zoti ju socialistët”.
“Janë të pavërteta. Tërmeti në Durrës ishte shkatërrues. Gjej rastin të ngushëlloj të afërmit që humbën fëmijët. Nuk është pallat por hotel. Hoteli është funksional dhe nuk kishte si të kishte 2 kate tepër dhe t’ia hiqja unë. Nuk është hequr asnjë kat jo dy kate. Hoteli ka pësuar vetëm plasje të vogla të mureve, asgjë tjetër. Nuk është klasifikuar i pabanueshëm. Është në gjendje pune dhe në këto momente. Nuk kam replikuar, kam qenë duke qeshur. Ai më tha ‘ju nëmi Zoti ju socialistët se ju ra tërmeti’ e tha që ‘Edi Rama do dorëzohet para Bashës’. Deshi të përfitonte nga fatkeqësia. Boçi është thjesht si gjithë shokët e tij që mundohet të mashtrojë edhe në këto situata jo të qarta për qytetarët e Durrësit dhe Tiranës. Unë në Durrës isha me duar në xhepa, po qeshja me të, u takova përzemërsisht kaq. Më ka bërë një foto në rrugë ku isha dhe kaq. Kam qenë në Tiranë dhe në Durrës kam parë disa zona. Ka dëmtime në mure dhe jo në banesa. Sektori i ndërtimit i rezistoi këtij tërmeti të fuqishëm”, tha Abazi./Opinion.al
