Pas deklaratave të kreut të PD-së, Sali Berisha, i cili në konferencën për mediat të ditës së sotme, i bëri thirrje deputetit Gazment Bardhi të zbardhë rolin e tij në ngjarjen e Elbasanit, ku mbeti i vrarë Pjerin Xhuvani, ka ardhur edhe reagimi brenda PD.
Grupi që mbështet Enkelejd Alibeajn, akuzon Berishën se po përdor ngjarje të rënda për interesa të tij personale. Sipas tyre, Berisha mbron bandat e Elbasanit të cilat i përdori kundër demokratëve në tentativën e tij për të marrë peng PD.
“PD dënon me forcë përdorimin e një ngjarje të rëndë për interesa të Sali Berishës. Është e pafalshme të shohësh se si Sali Berisha mbron bandat e Elbasanit edhe pse ai tashmë është peng i tyre, sepse i përdori kundër demokratëve në tentativën e tij për të marrë peng PD. Për hallin e tij, Sali Berisha bëri koalicion edhe me Aqif Rakipin, Tom Doshin dhe Vangjush Dakon. Këtë e dinë gjithë demokratët dhe gjithë qytetarët e Shkodrës, Elbasanit dhe Durrësit. Për hallin e tij, Sali Berisha kërkon të shkatërrojë PD-në dhe ta izolojë atë nga çdo partner ndërkombëtar.
Siç po shihet çdo ditë në këtë sipërmarrje, ai ka partner kryesor Edi Ramën. Mjafton të shikoni sot vendimin e Komisionit të Ligjeve, për të kuptuar se si Edi Rama është aleati i Sali Berishës. Ata kanë halle të përbashkëta dhe për hallet e tyre duan të bëjnë kurban PD-në”-thuhet në reagim./Opinion.al
