Prezantuesi i CNN, Don Lemon, ka sulmuar rrjetin televiziv pas shkarkimit të tij, i cili erdhi pas akuzave për mizogjini dhe sjellje të pahijshme.
“Jam i habitur. Në asnjë moment nuk më është dhënë asnjë indikacion se nuk do të mund të vazhdoja të bëja punën që kam dashur në rrjetin televiziv”, shkroi Lemon në Twitter, duke thënë se agjenti i tij i tha që ishte shkarkuar.
CNN kundërshtoi Lemon, duke e quajtur versionin e tij të ngjarjeve “të pasaktë”.
“Atij iu ofrua një mundësi për t’u takuar me menaxhmentin, por përkundër kësaj lëshoi një deklaratë në Tëitter,” tha rrjeti në një deklaratë.
CNN njoftoi shkarkimin e Lemon, i cili bashkë-drejtoi emisionin e mëngjesit “This Morning”, duke i uruar çdo të mirë.
“Don do të jetë përgjithmonë pjesë e familjes së CNN dhe ne e falënderojmë për kontributin e tij gjatë 17 viteve të fundit. Ne i urojmë atij çdo të mirë dhe do ta përkrahim në përpjekjet e tij të ardhshme” tha CEO i CNN Chris Licht.
Ai u kritikua gjerësisht për komentet seksiste që bëri në “CNN This Morning” në shkurt. Gjatë një diskutimi në ajër rreth propozimit të kandidates republikane presidenciale Nikki Haley që politikanët më të vjetër të bëjnë teste kompetencash.
Reputacioni i Lemonit u turbullua më tej nga një raport nga Variety më herët në prill , i cili detajonte akuzat për sjellje mizogjene ndaj kolegëve të tij të CNN, por Lemon i mohoi.
Shkarkimi vjen pas një tjetër largimi të madh të medias amerikane. Vetëm pak çaste para njoftimit të Lemon, Fox News njoftoi se po ndahej me prezantuesin e primetime Tucker Carlson.
