Autoriteti i Kontrollit Ushqimor ka asgjësuar 49 ton inpute bujqësore dhe ka ndëshkuar me 2.4 milion lekë 5 subjekte, 2 prej të cilave i është ndërprerë aktiviteti.
Kontrollet e AKU janë kryer në kuadër të garantimit të përmbushjes së kërkesave ligjore të sigurisë ushqimore, mbrojtjen e konkurrencës së ndershme dhe interesave të konsumatorëve.
Në Tiranë janë sekuestruar rreth 225 kg produkte ushqimore pastiçerie dhe është gjobitur subjekti “Sami Cerri”.
Në Lushnje është konstatuar një market ku mallrat kishin kaluar datën e skadencës. AKU asgjësoi mallrat dhe gjobit subjektin.
Në Korçë u evidentuan me probleme dy subjekte që përpunonin qumësht. Në total u sekuestruan rreth 500 kg djath i papërshtatshëm për konsum. Gjithashtu në Korçë AKU bllokoi aktivitetin e një njësie tregtimi për mos përmbushje të kushteve higjeno-sanitare.
Drejtoria Rajonale e AKU Shkodër ka bërë asgjësimin e rreth 48.7 ton farë misri të papërshtatshme për mbjellje. /Opinion.al
