Kishte 18 vite që operonte në aktivitetin “Magazinë mielli dhe ushqimi për blegtorinë”, por subjekti “Afrim Bici” nuk ishte kontrolluar asnjëherë, madje kishte zgjeruar aktivitetin edhe në “Prodhim, përpunim dhe shpërndarje me shumicë e ushqimeve për kafshë që përdoren për ushqim” për të cilin nuk dispononte licencën përkatëse (kategoria II.1.A.2) dhe njëkohësisht tregtonte edhe plehra kimike (Ure, DAP, Superfosfat dhe Nitrat).
Pas kontrollit të ushtruar dhe shkeljeve të rënda të konstatuara, Autoriteti Kombëtar i Ushqimit njoftoi se ka bllokuar 141.6 tonë produkte të pasigurta, ka ndëshkuar me 3.15 milionë lekë gjobë subjektin dhe ka bllokuar aktivitetin e magazinës.
AKU sqaron se aktiviteti ushtrohej në kushte të papërshtatshme higjeno-sanitare.
Sipas njoftimit, produktet nuk ishin të sistemuara në paleta, por të hedhura në dysheme, si dhe konstatohej prania e lagështisë, minjve të ngordhur, merimangave dhe parazitëve të tjerë.
Gjithashtu AKU konstatoi se ambjenti i ambalazhimit dhe magazinimit ishte i padezinfektuar, produktet ushqimore ruheshin në të njëjtin ambjent me plehrat kimike dhe një sërë shkeljesh të tjera./Opinion.al
