Rreth dy javë më parë aktorja e njohur shqiptare Margarita Xhepa ju nënshtrua një operacioni në këmbë në spitalin “Hygeia”. Tashmë aktorja e shumë roleve gëzon shëndet të plotë pas operacionit të vështirë, por të suksesshëm dhe ditën e sotme ka festuar 85-vjetorin e lindjes.
Në foton e publikuar në faqen zyrtare të spitalit “Hygeia” e shohim aktoren, e cila mban titullin “Nderi i Kombit”, në formë të mirë shëndetësore e rrethuar nga ekipi i mjekëve që është kujdesur çdo çast për të. Gjithashtu ajo është vizituar edhe nga Presidenti i Republikës së Shqipërisë, Ilir Meta, i cili ka shkruar në Facebook rreth kësaj vizite.
“Shumë pranvera të tjera të lumtura për yllin e kinematografisë shqiptare, të papërsëritshmen, Margarita Xhepa. I uroj shërim të shpejtë, besimplotë se do ta shohim sërish në skenë me të tjera role, që do t’i shtojnë freskinë buqetës së saj të jashtëzakonshme artistike,”-përfundon Meta.
Aktorja e dashur për publikun shqiptar pritet të dalë këto ditë nga spitali, ndërkohë që në këto foto e shohim të rrethuar nga lulet dhe afeksioni si i bluzave të bardha, ashtu edhe të personave që e kanë vizituar në ditën e saj të lindjes./Opinion.al/
