Eljan Tanini, një aktivist i shoqërisë civile ishte nga protestuesit më të ashpër ndaj parkut të lojërave te liqeni. Fotoja e tij (lart) do të mbahet mend gjatë.
Por sot, gjithçka duket se është hedhur pas krahëve, pasi aktivisti i njohur është fotografuar teksa shtrëngon dorën me kryetarin e Bashkisë së Tiranës Erjon Veliaj.
Kjo foto është shkrepur gjatë një ceremonie të organizuar nga Bashkia ku u përzgjodhën 4 fituesit e parë të konkursit për Skulpturat e Parkut, vepra të krijuara nga artistë të rinj që do të vendosen në parqet kryesore të kryeqytetit. Ky shtrëngim duarsh nuk ka qenë aq i rastësishëm, pasi Eljan Tanini është përzgjedhur mes fituesve të këtij konkursi me veprën e tij “Raketa”, një ide mjaft origjinale që do të marrë jetë në parkun e ish-fushës së Aviacionit.
“Ëndrra Fëmijërie”. Kjo është një ndër katër veprat fituese në konkursin e Skulpturave të Parkut, organizuar nga Bashkia e Tiranës. E falenderoj jurinë profesioniste, dhe të gjithë ata që e kuptuan idenë time për ta dashur këtë qytet. Kjo vepër është prezantuar edhe më parë, por askush nuk pati vullnetin ta kuptonte. Si shenjë e memories kolektive, do të vendoset te Ish Fusha e Aviacionit”, shkruan Tanini në profilin e tij në rrjetin social Facebook.
