Disa persona kanë përfunduar në pranga të dyshuar për ngjarjet kriminale të ndodhura gjatë muajve të fundit në qytetin e Shkodrës. Policia arrestoi të mërkurën katër persona si të dyshuar .
Prokuroria e Shkodrës kërkoi autorizim në gjykatë për kontrolle banesash dhe automjetesh. Pas marrjes së këtij autorizimi, prokuroria urdhëroi policinë për kryerjen e kontrolleve në banesat e anëtarëve të familjeve Licaj dhe Bajra.
Pas ngjarjeve të rënda, prokuroria ngriti një grup të posaçëm hetimor për zbardhjen e tyre.
Prej mbrëmjes së të martës Shkodra është në shtetrrethim!
Forca të shumta të policisë, reparti Renea, Shqiponjat dhe Ndërhyrja e Shpejtë kanë zbarkuar me urdhër të ministrit të Brendshëm Fatmir Xhafaj, me kontrolle intensive në lagjet ku dyshohet se qëndrojnë persona me precedent penal ose në kërkim. Policia e Shtetit konfirmoi edhe bllokimin e 4 automjeteve të blinduara.
Ndërkohë forcat e policisë po krehin zonën e Livadheve, Dobraçin dhe Kirasin, zona që cilësohen problematike në lidhje me rendin publik.
