Task Forca e Bashkisë Lezhë, në bashkëpunim me Policinë e Shtetit, vijon kontrollet përgjatë vijës bregdetare të Shëngjinit, me fokus lirimin e hapësirave publike dhe verifikimin e abuzimeve me çmimet gjatë sezonit turistik.
Gazetari i Klan News, Martin Marku raporton se të premten, aksioni u përqendrua në zonën e Kunes, ku u sekuestruan çadra dhe shezlongë në tre subjekte private. Për këto raste janë vendosur masa administrative për shkelje të rregullave.
Administratori i Njësisë Administrative Shëngjin, Brahim Demi, tha se nuk do të ketë asnjë tolerim për shkelësit e ligjit. Sipas tij, janë konstatuar edhe raste abuzimi me çmimet, kryesisht në zonën e Ranës së Hedhur.
Që prej muajit qershor, Task Forca e ngritur nga Bashkia Lezhë ka qenë aktive në monitorimin dhe kontrollin e të gjithë vijës bregdetare, nga Rana e Hedhur deri në Kune, për të garantuar një sezon turistik të qetë, të sigurt dhe në përputhje me ligjin.
