Gjyqtari kryesor i Kategorisë Superiore, Laver Alla përfundon në burg. Një aksident tragjik i ndodhur të martën në mbrëmje në Lushnjë ka bërë që arbitri lushnjar të përfundojë në qeli. Gjyqtari i elitës së futbollit shqiptar ka qenë në drejtimin e makinës së tij kur ka përplasur një motoçikletë duke i shkaktuar vdekjen një 66-vjeçari. Në këtë mënyrë, Alla është arrestuar menjëherë nga forcat e policisë dhe ka përfunduar në pranga.
Në njoftimin e lëshuar nga Policia e Qarkut Fier thuhet: “Ditën e djeshme, Laver Alla, 31 vjeç, banues në lagjen “Gafurr Muço” në Lushnjë, duke drejtuar mjetin tip “Citroen X Sara” me targë AA 387 NV, ka aksidentuar mjetin motoçikletë tip “Dayang” me targë AP 036 që drejtohej nga shtetasi E.M. 66-vjeçari banues në fshatin Dushk, Lushnjë, ndërroi jetë në Spitalin e Lushnjës.
Specialistët e Seksionit të Qarkullimit Rrugor arrestuan në flagrancë shtetasin Laver Alla”, – thuhet në njoftimin e policisë. Është bërë e ditur se arbitri do të gjykohet për veprën penale “Shkelje e rregullave të qarkullimit rrugor me pasojë vdekjen”.
Alla është një prej gjyqtarëve të elitës së futbollit shqiptar ku prej vitesh ka mbajtur peshë në shumë ndeshje të rëndësishme. Tashmë, do t’i duhet të përballet me gjykimin për një ngjarje tragjike ku ka humbur jetën një person dhe rrezikon burgimin deri në 5 vjet./Panorama
