Tre të rinj humbën jetën tragjikisht sot në mesditë në fshatin Adriatik të Laçit. Makina me të cilën udhëtonin, Lancia me targa AA 389 MO është kthyer në një grusht hekurash siç shihet edhe në foto. Viktimat fatkeqësisht janë të rinj, të moshës nga 17 deri në 22 vjeç. Ata janë identifikuar nga policia me emrat: Jul Maxhuni 22 vjeç nga Kombinati në Tiranë, Simon Kaza 20 vjeç nga fshati Adriatik i Laçit, Bert Marku 17 vjeç po nga fshati Adriatik. Policia nuk jep ende detaje mbi shkaqet që çuan në këtë aksident fatal. Ndërsa banorët e zonës hodhën dyshime se drejtuesi i mjetit mund të ketë qenë nën efektin e alkoolit, pasi tre të rinjtë janë parë një kafe të zonës para aksidentit. Sipas tyre, u ka dalë një zetor përpara dhe për ta shmangur makina ka përfunduar në kanal.
Njoftimi i plotë
Më datë 01.05.2018, rreth orës 14:30, është marrë njoftim se në Adriatik -Kurbin, ka ndodhur një aksident automobilistik.
Menjëherë në vendngjarje kanë mbërritur shërbimet policore që kanë konstatuar mjetin tip Lancia me targë AA 389 MO , i cili kishte dalë nga rruga duke u përmbysur në kanalin anësor të rrugës.
Për pasojë kanë humbur jetën të 3 shtetasit që ndodheshin në mjet, J.M. 22 vjeç banues në Kombinat – Tiranë , S.K. 20 vjeç banues në Adriatik – Kurbin dhe B.M. 17 vjeç banues në Adriatik – Kurbin.
Grupi hetimor në bashkëpunim me Prokurorinë e Rrethit Gjyqësor Kurbin, po vazhdojnë hetimet për zbardhjen e plotë të shkaqeve të aksidentit.
