Presidenti Ilir Meta ka reaguar për aksidentin tragjik të ndodhur sot në autostradën e Vlorës, ku humbën jetën 4 anëtarë të një familjeje.
Teksa u shprehu ngushëllimet familjarëve, Meta kërkoi një hetim të plotë për ngjarjen dhe i bëri apel policisë që të marrë masa për të parandaluar tragjedi të tilla.
“Kam përcjellë me trishtim shumë të thellë lajmin e rëndë të humbjes së familjes Gushi në një aksident tragjik në aksin rrugor Fier-Vlorë. I bashkohem dhembjes së të afërmve dhe ju shpreh ngushëllimet më të ndjera! Zoti t’ju japë forcë për të përballuar këtë tragjedi, që na ka tronditur sot të gjithëve.
Duke kërkuar një hetim të plotë, i apeloj Policisë Rrugore dhe çdo strukture tjetër përgjegjëse, të marrin të gjitha masat efektive për të parandaluar të tilla tragjedi, sidomos në këtë periudhë të ngarkuar të sezonit turistik. Ju bëj thirrje të gjithë qytetarëve të udhëtojnë me shumë kujdes! Shpejtësia vret”, shkruan Meta.
Mëngjesin e sotëm në autostradën Fier-Vlorë, u regjistrua një aksident i rëndë me pasojë vdekjen e katër anëtarëve të familjes Gushi. Makina me të cilin ata udhëtonin, u godit nga mbrapa nga një mjet tip Audi. Për pasojë vdiq çifti i bashkëshortëve dhe dy vajzat e tyre të mitura./Opinion.al
