Zbardhen detaje nga aksidenti tragjik qe i mori jeten dy te rinjve në superstradën Fushë Krujë-Thumanë. Policia ka marre ne pyetje të mbijetuarit e aksidentit, të cilët kanë treguar se ku ishin takuar e ku po shkonin.
Katër të rinjtë udhëtonin në të njëjtin mjet me targa AA 166 LA, i cili u përplas me trafikndarësen. Sipas Policisë, Roland Kacani, 28 vjeç nga Tirana, (shoferi i mjetit) dhe Altin Prendushi, 25 vjeç nga Lezha, (i cili ndodhej në vend të parë pasagjer) gjetën vdekjen pak pas përplasjes, ndërsa dy pasagjerët që ndodheshin në sediljen e pasme dhe që mbetën të plagosur janë, Eduard Lamaj, 27 vjeç nga Laçi dhe Bledar Dauti, 31 vjeç nga Tirana.
Katër të rinjtë u transportuan me urgjencë drejt spitalit të Traumës, por fatkeqësisht dy prej tyre nuk u kanë mbijetuar plagëve të shumta që kishin marrë në pjesë të ndryshme të trupit dhe në kokë.
Menjëherë në vendin e ngjarjes mbërritën forcat të shumta policie si dhe ekspertët e aksidenteve, te cilët nisën punën për zbardhjen e ngjarjes.
Krahas matjeve dhe procedurave të tjera standarde në vendin e ngjarjes, grupi hetimor ka marrë në pyetje të mbijetuarit, që kanë thënë se ishin takuar në Tiranë, aty ku kishin darkuar të katërt si shokë dhe më pas ishin nisur drejt Lezhës.
Nga hetimet paraprake rezulton se automjeti ka qenë me shpejtësi të lartë dhe është përplasur në fillim me trafikndarësen dhe më pas është rrotulluar në rrugë dhe për pasojë automjeti është dëmtuar thuajse tërësisht, gjë, e cila solli edhe vdekjen e dy të rinjve nga Tirana dhe Lezha.
Për zbardhjen e shkaqeve, Policia e Qarkullimit Rrugor ka nisur hetimet për të verifikuar nëse drejtuesi i mjetit që mbeti i vdekur, ka konsumuar pije alkoolike apo lëndë narkotike.
NJOFTIMI I POLICISE:
Më datë 06.09.2017, rreth orës 23: 40, në superstradën Fushë-Krujë – Thumanë, nje mjet është përplasur ne trafikndarësen. Për pasojë janë dëmtuar rëndë 4 shtetas. Fatkeqësisht kanë ndërruar jetë në Spitalin Ushtarak Tiranë shtetasit R. K. 28 vjeç, banues në Tiranë dhe A.P. 25 vjeç, banues në Laç dhe ndodhen nën kujdesin e mjekëve shtetasit L.S. banues në Laç dhe B.D. banues në Tiranë. Grupi hetimor po punon për sqarimin e rrethanave të ngjarjes.
