Rruga Teodor Keko në Unazën e Re në kryeqytet shpeshherë është kthyer në vend për aksidentet rrugore. Në të shumtën e rasteve, këmbësorët janë shkaktarët kryesorë.
“Kjo tabelë në zonën e Astirit, ndalon kalimin e këmbësorëve në Unazën e Madhe, por nuk respektohet nga qytetarët, pavarësisht aksidentit me një viktimë në të njëjtën rrugë.”
Edhe një ditë pas përplasjes së rëndë ku humbi jetën një 67-vjeçar, qytetarët vijojnë të kapërcejnë karrexhatën. Ata zgjedhin të kalojnë në rrugën më të shkurtër, edhe pse vijat e bardha dhe semafori është vetëm 100 metër më larg. Rrugën e kalojnë edhe fëmijët, të pashoqëruar nga persona të rritur.
Kjo shkelje parashikohet të ndëshkohet me masë administrative, por ligji nuk e ka përcaktuar mënyrën e vjeljes së gjobës, dhe si rrjedhojë nuk është aplikuar ndonjëherë nga Policia Rrugore.
Nga pamjet filmike, fajtor i aksidentit duket këmbësori, por policia arrestoi shoferin e mjetit, Preng Marku. Nga matja që i është bërë në ambientet e policisë, 30-vjeçari ka rezultuar me 0% alkool dhe lëndë narkotike.
Gjatë dy muajve të fundit, sipas të dhënave të INSTAT, këmbësorët kanë shkaktuar aksidente në 19.2% të rasteve, të dhëna që flasin për rritje të ngjarjeve rrugore të shkaktuara nga kjo kategori./ Klan News
