Policia Rrugore është duke hetuar për të nxjerrë konkluzionin përfundimtar të përfundimtar të aksidentit të së Hënës në Tiranë, ku autobusi i linjës së Unazës u përplas me disa automjete duke shkaktuar 9 të lënduar.
Sipas Klan News, hetuesit kanë marrë në administrim kartelat shëndetësore, të 63-vjeçarit Agron Xhafa, shoferit të autobusit që tashmë është vënë në pranga.
Kjo synon të qartësojë pretendimet e shoferit, i cili gjatë marrjes në pyetje është shprehur se vuan nga zemra e diabeti, dhe në momentin e aksidentit ka patur gjendje të fikti dhe nuk mban mend asgjë.
Mirëpo një pjesë e 40 pasagjerëve që ishin në urban kanë deklaruar se nuk kanë konstatuar komplikacione shëndetësore të shoferit 63-vjeçar. Deklaratat e tyre pritet të qartësohen në vijim nga policia.
Po ashtu policia ka këqyrur gjendjen teknike të mjetit, të gomave, sistemit të drejtimit dhe të frenimit.
Referuar po Klan News, nga këqyrja paraprake nuk janë konstatuar problematika të gjendjes teknike të mjetit, mirëpo pritet të kryhet një ekspertizë më e detajuar edhe në nga inxhinierët përkatës. Pavarësisht se gjendja teknike duket konform rregullave, në vendin e aksidentit nuk janë konstatuar shenja të frenimit nga autobusi.
Hetimet gjithashtu kanë zbuluar se mjeti kishte kolaudim me afat deri në muajin Shtator, i certifikuar për të kryer transportin e udhëtarëve, ndërsa shoferi dispononte patentë të kategorisë D.
Një ditë pas aksidentit, të gjithë personat e lënduar kanë lënë ambientet e spitalit, pasi kanë marrë ndihmë mjekësore. Ambientet e Traumës i ka lënë dhe shoferi Xhafa, i cili është dërguar në paraburgim, pasi ndaj tij rëndojnë akuzat e shkeljes së rregullave të qarkullimit rrugor.
