Detaje të reja janë zbardhur nga aksidenti i ndodhur ditën e sotme në aksin rrugor Qafë Thanë-Prrenjas.
Sipas uniformave blu, nga përplasja e autobusit me automjetin tip “Benz”, kanë mbetur të plagosur 6 persona.
Nga informacionet zyrtare bëhet me dije se ka mbetur i plagosur drejtuesi i automjetit tip “Benz” si dhe 5 pasagjerët që udhëtonin me të.
“Rreth orës 16:20, në aksin rrugor Qafë Thanë – Prrenjas, autobusi që drejtohej nga shtetasi I. A., 51 vjeç, me drejtim lëvizjeje Pogradec – Prrenjas, është përplasur me automjetin tip “Benz”, që drejtohej nga shtetasi I. M., 28 vjeç, me drejtim lëvizjeje nga Prrenjasi në drejtim të Pogradecit.
Si pasojë e aksidentit automjeti tip “Benz” është përfshirë nga flakët dhe për pasojë janë dëmtuar drejtuesi i automjetit dhe 5 pasagjerët që udhëtonin me të, të cilët janë transportuar menjëherë në spital, për ndihmë mjekësore.
Gjithashtu, janë shkaktuar vetëm dëme materiale në autobusin që drejtohej nga shtetasi I. A”, tha policia.
Në vendngjarje ndodhen shërbimet e Policisë Rrugore të DVP Elbasan dhe grupi hetimor, i cili vijon punën për zbardhjen e rrethanave të aksidentit./Opinion.al
