Një aksident i pazakontë në kuzhinë i ka marrë jetën yllit francez të rrjeteve sociale, Rebecca Burger.
Blogerja e njohur që bënte postime të shumta lidhur me stilin e jetesës humbi jetën pasi i shpërtheu pajisja për shpërndarjen e shllakut.
“BBC” tha se vdekja e 33-vjeçares, Rebecca Burger, u raportua në Facebook nga familja e saj, e cila e quajti “aksident në shtëpi”. Një paralajmërim ndaj pajisjeve shpërndarëse me defekte është postuar edhe në llogarinë e saj në Instagram, ku thuhej se pajisja “kishte shpërthyer dhe kishte goditur gjoksin e Rebecaa’s, duke i shkaktuar vdekjen”.
Familjarët paralajmëruan lexuesit të mos e përdornin, duke theksuar se mijëra pajisje defektoze mbeten në qarkullim.
Media franceze raportoi se e reja kishte pësuar një arrest kardiak pas incidentit, pavarësisht se mori kujdesin mjekësor.
Figura popullore e fitnesit dhe e udhëtimeve në Francë kishte 55 000 ndjekës në Facebook dhe 154 000 ndjekës në Instagram.
Pajisja e shpërndarjes së shllakut funksionon duke injektuar gaz në një enë metalike, duke e mbajtur të gjithë pajisjen nën presion të lartë.
Një grup konsumatorësh francezë kanë paralajmëruar lexuesit për “kapsulat e gazit”, që shkaktojnë shpërthimet.
Revista “60 Millions” raportoi se pajisje të tilla kanë shkaktuar thyerje dhëmbësh, fraktura të ndryshme dhe madje edhe humbje të njërit sy. Por, revista tha se pajisjet e reja të pas 2015-ës duken më të sigurta.
“Le Parisien” tha se një prodhues kërkoi kthimin e pajisjeve, por një vit pas thirrjes ishin kthyer mbrapsht vetëm 25 000 nga 160 000 të shitura, çfarë do të thotë se 135 000 mbetën në qarkullim. /tvklan.al
