Mes të plagosurve në aksidentin e rëndë të ndodhur në Greqi, ku u përplasën dy trena, ka edhe shqiptarë.
Ministria e Jashtme bën me dije se bazuar në komunikimin që ka patur konsullata shqiptare në Greqi me autoritetet greke mësohet se 5 persona me nënshtetësi shqiptare rezultojnë të plagosur, jashtë rrezikut për jetën.
“Bazuar në komunikimin e fundit që ambasada dhe konsullata shqiptare në Greqi kanë pasur me autoritetet greke, deri më tani nuk ka informacion për shtetas shqiptarë në radhët e viktimave të aksidentit hekurudhor. Po vijohet me identifikimin e tyre. 5 persona me nënshtetësi shqiptare rezultojnë të plagosur, jashtë rrezikut për jetën e po trajtohen në kushte spitalore.”- thuhet në njoftimin e MEPJ.
Deri tani 38 persona kanë humbur jetën si pasojë e aksidentit të ndodhur në Tempi, pranë Larisës. Dy trena, një i mbushur me pasagjerë dhe tjetri me mallra, u përplasën duke shkaktuar një tragjedi të vërtetë, më e madhja në Greqi sa i përket transportit hekurudhor.
