Gjykata e Vlorës ka dhënë masën e sigurisë arrest me burg për Igli Madanin, 22-vjeçarin që akuzohet se shkaktoi aksidentin e rëndë me 4 viktima dy ditë më parë në autostradën Levan-Vlorë.
Madani është njohur me masën e sigurisë “arrest në burg” nga avokati i tij, pasi ndodhet ende në spital pas plagëve të marra. Edhe pse pala mbrojtëse ka kërkuar një masë më të lehtë për 22-vjeçarin duke thënë se është në gjendje të rënduar psikologjike, kjo nuk është pranuar nga gjykata.
Madani, banues në Tiranë, ka goditur nga mbrapa mjetin tip “Toyota” ku udhëtonte Eduart Gushi, 44 vjeç së bashku me bashkëshorten Silvanën, 33 vjeçe dhe dy vajzat e mitura.
Për pasojë mjeti ka dalë nga rruga duke u shkatërruar plotësisht dhe duke shkaktuar vdekjen e 4 anëtarëve të familjes Gushi. Nga aksidenti kanë mbetur të plagosur dhe dy pasagjerë që udhëtonin me të riun, por ata morën plagë të lehta./Opinion.al
