Drazeli ka mundur të kthehet tre herë në jetë. Në “Ka Një Mesazh Për Ty” ai rrëfeu se si gurët në veshka në moshën 22-vjeçare e çuan drejt operacionit, dializës e më vonë iu nevojit edhe një transplant. Veshka që i shpëtoi jetën iu dhurua nga nëna dhe për disa vite, Drazeli ishte mirë me shëndet.
Pas tre vjetësh nga transplanti, vijoi ai në rubrikën nga “E Diela Shqiptare” në Tv Klan, pësoi një paralizë dhe ndërkohë gjeti dashurinë tek Teuta. Ata sollën një jetë një djalë, Darielin, i cili sot është 12 vjeç dhe Drazeli po vazhdonte jetën normalisht deri në momentin kur u përball dy herë të tjera me vdekjen.
Drazel: Pësova një aksident afër shtëpisë time. Shoku im sot nuk është më, ndërroi jetë, unë shpëtova.
Ardit Gjebrea: Por nga aksidenti, veshka jote, që të dhuroi mami…
Drazel: Pastaj unë vete në spital dhe më thonë që “Drazel, veshkat po flaken”. Filloj, “hyr në dializë një vit e gjysmë në Fier dhe pastaj bëjmë letrat që të kryesh transplantin”. M’u hodh vëllai, binjaku, “organin do të ta jap unë Drazel”. Bëri ato analizat, dolëm mirë. Vajtëm në Turqi, duke bërë analizat atje doktori tha “nuk bëhet se nuk ke dalë mirë” kështu që u detyruam u kthyem prapë në shtëpi, nuk bëmë dot.
Pas dy javëve, se unë vija nga dializa dhe nuk vija mirë, djali i vogël i thotë të ëmës “mami, dua jetën e babit, nuk më intereson asgjë në jetë, vetëm jetën e babit dua”. Edhe ajo ashtu dëgjoi, ashtu vendosi. “Qoftë e bërë të keqen mami, unë ty dhe babin dua, nuk dua njeri tjetër. Shpirti im dhe jeta ime është vetëm për ju”. Mirëpo kjo nuse që më dha veshkën mua, ka shpëtuar edhe jetën e vëllait të vet. I vëllai vuante nga një sëmundje, leucemi dhe kjo i jep palcën vëllait dhe…
Ardit Gjebrea: Të jep edhe ty veshkën.
Drazel: Po, në Turqi.
Ardit Gjebrea: Dhe je me veshkën e Teutës.
Drazel: Po dhe unë gëzoj një jetë shumë normale, si gjithë të tjerët./tvklan.al
