Një aksident i rëndë u regjistrua mbrëmjen e djeshme në Shkodër, ku si pasojë e përplasjes, ndërruan jetë dy të mitur.
Njëri prej tyre, ishte 13-vjeçari Fabian Sh., i cili ishte pjesë e akademisë së futbollit “Djelmnia shkodrane”.
Për këtë, presidenti i Federatës Shqiptarë të Futbollit, Armand Duka ka ndarë një mesazh ngushëllimi.
Përmes një postimi në rrjetet sociale, kreu i futbollit e cilësoi tragjike ndarjen nga jeta të 13-vjeçarit, i cili ëndërronte të bëhej futbollist.
Postimi i plotë i Dukës:
“Një lajm tragjik ai i ndarjes nga jeta të Fabian Sh., djaloshit 13-vjeçar që ëndërronte që një ditë të bëhej futbollist dhe stërvitej dhe luante çdo ditë në akademinë “Djelmnia shkodrane.
Ëndrra e Fabianit u ndërpre në mes nga një aksident dhe dua, që në emrin tim dhe të Federatës së Futbollit, t’i shpreh ngushëllimet e sinqerta familjes së djaloshit, akademisë “Djelmnia shkodrane”, të afërmve dhe miqve me të cilën ai ndante të njëjtën ëndërr. Prehu në paqe Fabian.”
