Edlira Pisku 34 vjeçe ishte nisur nga Golemi ku jetojne për të parë familjarët e saj në Berat pas një telefonate që kishte marrë për gjyshen e sëmurë. Bashkë me të ishte edhe i vjehrri 69 vjeç Xhemil Pisku. Të dy mbeten të vdekur në vend, pasi një makinë që ecte me shpejtësi i përplasi në anë të rrugës. Pas kësaj tragjedie të madhe për familjen Pisku lajmi i mirë është se djali i saj, vetem 8 vjeç i ka shpëtuar aksidentit tragjik dhe ndodhet në spital në gjendje më të stabilizuar. Edlira la dy djem jetim. I shoqi punonte në emigracion në Greqi dhe e ka marrë vesh lajmin tragjik të humbjes së gruas dhe babait nga familjarët.
Aksidenti ndodhi në aksin rrugor Plepa-Kavajë pranë Malit të Robit në Golem sot rreth orës 07:40. Drejtuesja e automjet tip Toyota humbi kontrollin e drejtimit, duke përplasur tre këmbësorët në anë të rrugës.. Policia ndaloi drejtuesen e automjetit, 30 vjecaren Ilda Parroj, e cila deri më tani nuk ka thënë asnjë fjalë për shkak të tronditjes.
Ekspertët e aksidenteve sqarojnë se drejtuesja ka humbur kontrollin e automjetit për shkak të shpejtësisë dhe lagështirës në rrugë. Fillimisht automjeti është përplasur me barrierën anësore dhe me pas ka goditur tre këmbësoret. Pas kësaj goditje automjeti është permbysur në rrugë.
Për tragjedinë në familjes Pisku flasin, komshinjtë të cilët vrapuan në vendin e ngjarjes sapo mësuan për ngjarjen.
Si e njihni Xhemilin?
Burrë më i lartë në zonën e Golemit… Po shkonin në Berat me nusen e djalit.
E pashë në televizor lajmin, sapo e pashë. Kemi 20 vjet bashkë në Golem, matanë lapidarit, unë dhe ai. Familje e nderuar, edhe nusat, edhe çunat.
Jemi shumë të prekur, si na ra. Familje e mirë, familje e lartë.
Po kështu ata tregojnë se mungesa e një mbikalimi përbën një problem madhor ç’ka iu rrezikon jetën çdo ditë banorëve të zonës. “Mbikalimi është shumë problem”, shprehet banori i Golemit.
