Në dy javët e para të janarit 12 persona kanë humbur jetën nga aksidentet rrugore në vendin tonë. Disa nga shkaqet e aksidenteve janë shpejtësia, parakalimet e gabuara dhe mos vendosja e rripit të sigurimit.
Vetëm në datë 3 Janar nga 4 aksidente të ndryshme kanë humbur jetën 4 qytetarë në Përmet, Lezhë, Vlorë dhe Elbasan.
Ndërkohë, që aksidenti më i rëndë që tronditi opinion publik ishte aksidenti në Rrugën e Kombit, ku humbën jetën 4 anëtarë të familjes Avdijaj nga Kosova. Shkaku i këtij aksidenti ishte një parakalim i gabuar dhe shpejtësia e lartë që shkaktoi përplasjen mes automjetit, që po udhëtonte familja Avdija, me një kamion.
Gjithashtu të larta mbeten edhe shifrat e të plagosurve nga aksidentet. Tv Klan raporton se më shumë se 40 persona janë lënduar nga përplasjet e makinave.
Në ditët e para të këtij viti, aksidente të rënda janë shënuar edhe në kryeqytet. Ditën e sotme, një automjet përplasi për vdekje një vajzë 10 vjeçe, e identifikuar me inicialet A.P., në rrugën “Njazi Meka”, në Tiranë. Nga bilanci i deritanishëm, në ditët e para të vitit 2021, janë rreth 140 aksidente në të gjithë vendin.
Ndërkohë, Urgjenca Kombëtare deklaroi se viti 2020 u mbyll me 6248 aksidente, ku humbën jetën 159 persona, duke nënvizuar se po shënohen më shumë të vdekur nga aksidentet rrugore sesa në luftë./Opinion.al
