Katër shqiptarë kanë humbur jetën në aksidente brenda 24 orëve në dy shtetet fqinje Itali dhe Greqi. Së fundmi mësohet për një grua të moshuar e cila u përplas për vdekje në komunën Vittorio Veneto të Trevisos në Itali. Viktima quhej Gjyle Mina, shqiptare por jetonte prej vitesh në Itali. Aksidenti ka ndodhur mbrëmjen e djeshme, teksa 77 vjecarja tentoi të kalonte rrugën. Mediat vendase shkruajnë se shkak mund të jetë bërë pakujdesia dhe errësira në rrugë. Shoferi, një italian 54 vjeç është ndaluar nga policia.
Sakaq, një i ri shqiptar ka ndërruar jetë si pasojë e përplasjes së dy makinave në autostradën “469” në Sarnico të Italisë paraditen e së shtunës. Identiteti i viktimës nuk bëhet i ditur, por mediat shkruajne se jetonte në Breshia të Italisë.
I riu shqiptar udhëtonte i vetëm me një makinë tip “Citroen C2” që u përplas me një “Skoda”. Makina tjetër drejtohej nga një 63-vjeçar italian dhe pasagjerë në këtë automjet ishin prindërit e tij, përkatësisht 90 dhe 87 vjeç, të cilët mbeten të plagosur.
Ndërsa në Greqi ka ndodhur një tragjedi familjare. Burrë e grua vdiqën pasi u përfshinë në një aksident në aksin rrugor Xorteu – Koimisis. Drejtuesi i mjetit ka humbur kontrollin duke u përplasur me barrierat anësore të rrugës. Viktima janë të moshës 35 dhe 25 vjeç, ndërsa e plagosur lehtë ka mbetur vajza e tyre 2-vjeçare. /Opinion.al
