Një person u vra dhe nëntë janë plagosur, përfshirë fëmijë, në një aksident në një park lojërash në kryeqytetin suedez, Stokholm.
Sipas mediave të huaja, një prej vagonëve të “roller coaster it” kishte dalë pjesërisht nga shinat gjatë një udhëtimi, duke bërë që të binte nga një lartësi e madhe.
“Kjo është tragjike dhe tronditëse, dhe për fat të keq ne kemi mësuar se një person ka vdekur,” tha zëdhënësja e Grona Lund, Annika Troselius.
Pas ngjarjes, menjëherë në park kanë mbërritur ambulanca, zjarrfikëse, një helikopter dhe policia e cila ka nisur nga hetimet.
Policia tha se nëntë persona po trajtoheshin në spital, duke përfshirë tre të cilët kishin lëndime të rënda.
Grona Lund tha në një deklaratë se parku 140-vjeçar ishte i mbyllur deri në një njoftim të dytë, për shkak të ngjarjes së ndodhur.
Roller coaster-i në këtë park lojërash, i cili ka nisur të funksionojë në vitin 1988, mund të arrijë një shpejtësi maksimale 90 kilometra në orë, rruga totale që kalon është 800 metra dhe lartësia maksimale që arrin është 30 metra./Opinion.al
