Një aksident rrugor është regjistruar mëngjesin e sotëm në aksin rrugor Cërrik-Mollas. Dy mjete janë përplasur me njëra -tjetrën dhe si pasojë janë plagosur dy gra. Ato janë dërguar në Spitalin Rajonal Elbasan, ku ndodhen jashtë rrezikut për jetën.
“Rreth orës 09:30, në aksin rrugor Cërrik-Mollas, në fshatin Klos, mjeti tip “Volkswagen” me drejtues shtetasin A. M. është përplasur me mjetin tip “Renault” me drejtues shtetasen H. M.
Si pasojë e përplasjes është dëmtuar drejtuesja e mjetit tip “Renault”, shtetasja H. M., si dhe pasagjerja, shtetasja L. M., të cilat janë dërguar në Spitalin Rajonal Elbasan, jashtë rrezikut për jetën”, njofton policia.
Grupi hetimor ndodhet në vendngjarje dhe po punon për sqarimin e rrethanave të aksidentit./Opinion.al
