Një aksident i rëndë ka ndodhur në Brazil, ku është përplasur një autobus me një kamion dhe si pasojë kanë humbur jetën 22 persona.
Sipas mediave të huaja, aksidenti ndodhi në një autostradë në Minas Gerais, një shtet në Brazilin juglindor.
Autobusi raportohet se ishte nisur nga Sao Paulo dhe mbante 45 pasagjerë.
Dëshmitarët i thanë ekipeve të shpëtimit se autobusit i shpërtheu një gomë, duke bërë që shoferi të humbiste kontrollin dhe të përplasej me një kamion.
Me autobusin është përplasur edhe një makinë me tre pasagjerë, por që të tre kanë shpëtuar.
Guvernatori Romeu Zema shkroi në X se:
“Ne po punojmë për të siguruar që familjet e viktimave të mbështeten për ta përballuar këtë tragjedi në mënyrën më humane të mundshme, veçanërisht pasi ajo vjen pak para Krishtlindjeve.”
Në vitin 2024, më shumë se 10,000 njerëz vdiqën në aksidente trafiku në Brazil, sipas Ministrisë së Transportit./Opinion.al
