Një aksident me pasojë vdekjen e një personi ka ndodhur në aksin Lezhë-Shkodër. Mësohet se viktimë në këtë aksident ka mbetur Ndue Marku 70 vjeç, nga Blinishti.
Është dashur ndërhyrja e forcave zjarrfikëse për të nxjerrë trupin nga automjeti, pasi aksidenti ka qenë i fortë dhe kishte deformuar dyert.
Në aksident janë përfshirë dy makina, një mjet tip “Fiat” me targa AA 677 MF që drejtohej nga viktima dhe një mjet tjetër tip “Benz” me targa AA 814 PR.
Pas aksidenteve të rënda me pasojë vdekjen në ditët e para të këtij viti, ministri i Brendshëm Sandër Lleshaj paralajmëroi se po hartohet një paketë e re masash ligjore.
Në një postim në Twitter, Lleshaj shkruan se “papërgjegjshmëria në qarkullimin rrugor do të marrë një përgjigje të fortë”.
Sipas ministrit të Brendshëm, në javët e ardhshme do të prezantohet një paketë me masa ligjore dhe administrative, që do të shërbejnë për të rritur sigurinë rrugore./ Opinion.al
