Një aksident rrugor është regjistruar pasditen e kësaj të premteje në aksin nacional Lushnje – Fier. Dy automjete janë përplasur me njëra-tjetrën pranë mbikalimit në Savër.
Klan News, raporton se si pasojë e këtij aksidenti kanë mbetur të plagosur lehtë 4 persona, një nga drejtuesit e automjeteve, një shtetase italiane, e cila ishte pasagjere në mjet dhe 2 fëmijë, nxënës shkolle.
Ata janë dërguar në spitalin e Lushnjës për mjekim dhe janë jashtë rrezikut për jetën.
Dyshohet se shkak i aksidentit është mosrespektimi i rregullave në qarkullim. Dy mjetet po lëviznin në korsinë nga Lushnja në drejtim të Fierit. Njëri nga drejtuesit ka dashur të kthehet për në Savër, por është përplasur nga mjeti tjetër që vinte nga e njëjta korsi.
Një nga shoferët është B.Zeqo, i cili kishte në automjet 3 nxënës shkolle, nipërit e tij dhe po i dërgonte në shtëpi kur është goditur nga ana e derës nga mjeti tjetër që drejtohej nga O. Stefanaj nga Berati i cili ishte me të fejuarën e tij, një shtetase italiane.
Pas aksidentit, policia po merr në pyetje dy shoferët për të sqaruar rrethanat e aksidentit.
