Të paktën 48 persona kanë humbur jetën mbrëmjen e djeshme, kur një kamion u përplas me disa automjete dhe goditi disa këmbësorë në perëndim të Kenisë.
Sipas mediave të huaja, ngjarja ndodhi në një vend të njohur për aksidente pranë qytetit Londiani, i cili është rreth 200 kilometra në veriperëndim të kryeqytetit, Nairobi.
“Ne po dyshojmë se kamioni që po drejtohej drejt Kerichos humbi kontrollin dhe u përplas me minibusët lokalë, duke plagosur pasagjerë dhe këmbësorë që po qëndronin pranë stacionit të autobusit”, thanë autoritetet.
Oficerët në vendngjarje numëruan 48 trupa, por besohet se më shumë njerëz ishin të bllokuar në rrënoja, tha një udhëheqës i policisë për AP-në. Numri i personave të plagosur mbetet i paqartë.
Kryqi i Kuq i Kenias tha se kamioni përplasi më shumë se gjashtë automjete dhe përshkoi këmbësorët.
Gjithashtu konfirmon se reshjet e dendura të shiut kishin ndërprerë reagimin dhe se njerëzit ishin ende të bllokuar në automjetet e shkatërruara.
Numri i të vdekurve e bën aksidentin një nga më vdekjeprurësit në rrugët e Kenias në vitet e fundit. Vitin e kaluar, 34 njerëz vdiqën në Kenia qendrore kur autobusi i tyre doli nga një urë dhe përfundoi në lumë.
Numri i njerëzve të vrarë në rrugët e Kenias është rritur vitet e fundit, sipas statistikave të qeverisë./Opinion.al
