Një aksident i rëndë rrugor ka ndodhur në Itali në autostradën e Veronës kur një autobus me nxënës nga Hungaria u përplas me një këmbë të urës dhe mori flakë.
Si pasojë e këtij aksidenti tragjik gazeta italiane La Reppublica bën me dije se kanë humbur jetën 16 persona.
Ekipet e shpëtimit që kanë mbërritur në vendngjarje flasin për një tragjedi të madhe, pasi në bord ishin 55 persona, kryesisht të rinj mes moshës 14 dhe 18 vjet.
Tridhjetë e nëntë të plagosur janë transportuar deri më tani në spitalet e Veronës.
Sipas të dhënave fillestare, autobusi kishte ardhur nga Franca dhe ishte në tranzit në Itali për t’u kthyer në vendin e Evropës Lindore.
Duket se në autobus kishte kryesisht djem, që ktheheshin nga një vendpushim malor. Trupat e disa prej tyre ishin djegur aq keq, sa do të jetë i vështirë identifikimi, thanë dëshmitarët.
