Një aksident rrugor është regjistruar ditën e sotme në rrugën Turizëm Kanali i Cukës në Sarandë, ku janë përfshirë 4 automjete, njëra prej të cilave i përkiste një turisti slloven.
Mjeti tip KIA me drejtues Emro Cela, banor i Sarandës, ka zbritur nga një rrugë dytësore dhe ka pësuar defekt teknik duke përplasur fillimisht mjetin e një turisti slloven dhe më pas i ka prerë rrugën një tjetër makine, e cila ka përplasur një tjetër mjet që ishte pas tij.
Drejtuesi i mjetit KIA është plagosur lehtë dhe ndodhet në spital, ndërkohë që dëmet janë të konsiderueshme.
Miha, turist slloven, drejtues i njërit prej mjeteve, i ardhur sot me bashkëshorten për pushime në Sarandë, ka rrëfyer për news 24 se si ka ndodhur aksidenti.
“Unë po rrija në makinë, sapo kisha ndaluar në këtë vend, ndërsa gruaja imë sapo kishte dalë nga mjeti. U përpoqa që të mos zija rrugën por të futesha në një qoshe, siç e shihni, dhe brenda 2 minutash, një makinë po vinte me një shpejtësi dhe dukej sikur s’i funksiononin frenat. Kishte një shpejtësi marramendëse, dukej që ishte pa frena. U përplas me makinën time nga ana e shoferit dhe më pas në rrugën kryesore u përplas me një makinë tjetër. Mua më dhemb pak krahu, pastaj ka dëme materiale makina, u prish pasqyra, dy dyer të makinës nga krahu i shoferit, madje nga fuqia e madhe e përplasjes u hapën airbegët e makinës. Kishim vetëm pak orë në Shqipëri, sapo kishim arritur në Sarandë, po presim për një përkthyes që të japim dhe deklaratën tonë në polici.”, tha turisti.
