Një helikopter është përplasur me një kullë televizioni dhe është rrëzuar në autostradë, në Buyukcekmece të Stambollit, duke u marrë jetën të paktën pesë personave.
Lajmi bëhet i ditur nga agjencia shtetërore e lajmeve “Anadolu Agency”, e cila thotë se helikopteri u rrëzua rreth orës 11:30 me orën lokale (9:30 me orën shqiptare).
Helikopteri “Sikorsky S-76” ishte i kompanisë private “Eczacibasi holding”, me shtatë persona na bord, dy pilotë, katër të huaj dhe një turk. Kryetari i bashkisë së Buyukcekmecesë, Hasan Akgün tha se “kam parë trupat e pajetë të pesë personave në vendngjarje.”
Agjencia e lajmeve “DHA” tha se helikopteri ishte përplasur me një kullë televizioni 236 metra të lartë, e cila ka edhe një restorant në pjesën e sipërme.
Të dy kahet e autostradës ku është rrëzuar helikopteri janë mbyllur për trafikun.
Sipas informacioneve të transmetuara nga media turke helikopteri po udhëtonte nga aeroporti i Ataturkut në Stamboll në drejtim të një fabrike në rajonin Bozoyuk të Provincën e Bilecikut, mes Bursës dhe Stambollit.
